Описание
...Мин- Ер-Әсә!Мин- Ер-Әсә! Һеҙҙең күҙгә, Һеҙҙең йөҙгә тура ҡарап һөйләшәмен.. Эйе, шулай тигәндәй булды минең Ер-Әсәм- Имсәктауым рухы.Туҡта... Ни әйтергә теләй һуң ул беҙгә?! - Ошо ҡорһағымда йөрөтөп, күкрәк һөтөн имеҙеп үҫтергән, Кешеләрем! Мин һеҙҙе донъяға бар иткәнмен, минең тәмле һыуымды, саф һауамды һулап иркен йәшәйһегеҙ! Мин һеҙгә мәғрүр тауҙарымды, йәшел ҡалҡан- ағастарымды, шифалы үләндәремде, күҙҙең яуын алырҙай сәскәләремде, телеңде йоторлоҡ емеш-еләктәремде биргәнмен! Эй.Кешеләрем! Һеҙ улар менән рәхәтләнеп файҙаланаһығыҙ: ағастарымды ҡырҡаһығыҙ, шифалы үләндәремде, сәскәләремде өҙәһегеҙ,емеш-еләктәремде ашап ҡыуанаһығыҙ Ә һыуҙарым- йылғаларым- күлдәрем бысранып, һайығып, тауыҡ кисерлек хәлгә етеп баралар бит! Мин Ер-Әсә- мин түҙем һәм йомарт! Тик сабырлыҡтың да төбө, сиге була! Туҡтағыҙ, уянығыҙ, уйланығыҙ, Кешеләрем! Һеҙ бөгөн ҡырҡҡан ағас урынына-яңыһы үҫерме, һеҙ өҙгән шифалы үлән йәки матур сәскә һуңғыһы түгелме?! Бөгөн бысратҡан һыуҙарығыҙ –иртәгә балаларығыҙға ҡалырмы?! Бына ошолай, тип өндәште миңә Ер-Әсәм... Ысынлап та,беҙ үҙебеҙҙең тауҙар тарихын, унда нимә барын, ниндәй ағас, үҫемлектәр, емеш-еләктәр үҫеүен яҡшы беләбеҙме?! Ә белгегеҙ киләме? Әлбиттә киләлер! Бына шуға үҙемдең яратҡан уҡытыусым, ғөмүмән, тыуған еремә һөйөү тәрбиәләгән Гүзәл Марат ҡыҙы менән блог асырға булдыҡ әле. Был блог крайҙы өйрәнеү, күреүегеҙсә “Тәүге бишегем-Ишҡолом...” баш аҫтында барасаҡ.Бында беҙҙең яҡтың тау-таш тарихы, унда үҫкән үҫемлек исемдәре һәм улар тураһында бай мәғлүмәт алырһығыҙ. Тик , хуплап “лайыҡтар” ҡуйыу менән сикләнмәй, ә әүҙем ҡатнашыусылар кәрәк.Үҙебеҙҙең ауыл, район сигендә осраған тау-таш исемдәре, унда үҫкән ят үҫемлектәрҙе фотоға төшөрөп һалаһығыҙ.Унан үҙегеҙҙе ҡыҙыҡһындырған яуаптарға бергәләп яуап эҙләйбеҙ! Рәхим итегеҙ
